ਟਰੰਪ ਦੇ ਸੱਸ-ਸਹੁਰੇ ਨੂੰ ਮਿਲੀ ਅਮਰੀਕਾ ਦਾ ਨਾਗਰਿਕਤਾ

ਵਾਸ਼ਿੰਗਟਨ – ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਜਿਸ ਚੇਨ ਇੰਮੀਗ੍ਰੇਸ਼ਨ ਜਾਂ ਪਰਿਵਾਰਕ ਇੰਮੀਗ੍ਰੇੇਸ਼ਨ ਦਾ ਸਖਤ ਵਿਰੋਧ ਕਰਦੇ ਰਹੇ ਹਨ ਅਤੇ ਅਮਰੀਕਾ ਦੀ ਉਸ ਨੀਤੀ ਦਾ ਫਾਇਦਾ ਚੁੱਕ ਕੇ ਟਰੰਪ ਦੇ ਸਲੋਵੇਨੀਆਈ ਸੱਸ-ਸਹੁਰੇ ਨੇ ਦੇਸ਼ ਦੀ ਨਾਗਰਿਕਤਾ ਹਾਸਲ ਕੀਤੀ ਹੈ। ਅਮਰੀਕਾ ਦੀ ਚੇਨ ਇੰਮੀਗ੍ਰੇਸ਼ਨ ਜਾਂ ਪਰਿਵਾਰਕ ਇੰਮੀਗ੍ਰੇਸ਼ਨ ਨੀਤੀ ਦੇ ਤਹਿਤ ਕੋਈ ਵੀ ਬਾਲਗ ਅਮਰੀਕੀ ਨਾਗਰਿਕ ਆਪਣੇ ਰਿਸ਼ਤੇਦਾਰਾਂ ਲਈ ਅਮਰੀਕੀ ਨਾਗਰਿਕਤਾ ਹਾਸਲ ਕਰ ਸਕਦਾ ਹੈ। ਇਕ ਅੰਗ੍ਰੇਜ਼ੀ ਅਖਬਾਰ ‘ਚ ਪ੍ਰਕਾਸ਼ਿਤ ਖਬਰ ਮੁਤਾਬਕ, ਅਮਰੀਕਾ ਦੀ ਫਸਟ ਲੇਡੀ ਮੇਲਾਨੀਆ ਟਰੰਪ ਦੇ ਮਾਤਾ-ਪਿਤਾ ਐਮਾਲਿਜਾ ਅਤੇ ਵਿਕਟਰ ਕਨਾਵਸ ਨੂੰ ਵੀਰਵਾਰ ਨੂੰ ਫੈਡਰਲ ਇੰਮੀਗ੍ਰੇਸ਼ਨ ਅਦਾਲਤ ‘ਚ ਇਕ ਨਿੱਜੀ ਪ੍ਰੋਗਰਾਮ ਦੌਰਾਨ ਅਮਰੀਕਾ ਦੀ ਨਾਗਰਿਕਤਾ ਦਿੱਤੀ ਗਈ। ਮੇਲਾਨੀਆ ਦੇ ਮਾਤਾ-ਪਿਤਾ ਸਲੋਵੇਨੀਆ ਦੇ ਮੂਲ ਨਿਵਾਸੀ ਹਨ। ਉਹ ਹੁਣ ਤੱਕ ਮੇਲਾਨੀਆ ਵੱਲੋਂ ਸਪਾਂਸਰ ਕੀਤੇ ਗਏ ਗ੍ਰੀਨ ਕਾਰਡ ਦੇ ਸਹਾਰੇ ਅਮਰੀਕਾ ‘ਚ ਰਹਿ ਰਹੇ ਸਨ। ਉਨ੍ਹਾਂ ਦੇ ਵਕੀਲ ਮਾਈਕਲ ਵਾਇਲਸ ਨੇ ਮੀਡੀਆ ਨੂੰ ਇਹ ਜਾਣਕਾਰੀ ਦਿੱਤੀ ਹੈ। ਵਾਇਲਸ ਮੁਤਾਬਕ ਇਕ ਵਾਰ ਗ੍ਰੀਨ ਕਾਰਡ ਮਿਲਣ ਤੋਂ ਬਾਅਦ ਉਹ ਯੋਗਤਾ ਦੇ ਆਧਾਰ ‘ਤੇ ਨਾਗਰਿਕਤਾ ਲਈ ਅਪਲਾਈ ਕਰ ਸਕਦੇ ਹਨ।